無嘢補充

政府與巴士公司的長約一直傾唔埋欄,現時要再用多十四個月時間商討。對於坊間的傳聞,乃至詳細和具體的商討內容,政府和巴士公司都不願多透露。記者追問負責部門交通事務局,回應是詳細資料司長都介紹過,暫時無嘢補充。事實上,政府從來無詳細交代過。再問巴士公司,結果回應相當一致,政府方面都已解釋,暫時無資料可以補充。不過巴士公司就話好有信心在短期合同結束時能與交局達成共識。

事情若如他們所願當然最好,既無需要拖拖拉拉,費時失事,也無需讓外間繼續揣測。不過要傾都唔輪到今屆政府傾,目前只剩一個多月時間新舊政府便要交接,雖然說換屆不影響政府施政,但決策者唔同,想法自然有所不同,故交通事務局喺呢段時間應該無咩好做。就好似早前引起社會反對的澳門和內地駕照互認措施,到現在兩地仍未正式簽署,交通事務局都喺嗰句商談中,並非擱置,不過暫時無進一步消息可提供。

之前粵澳海關舉行會議,話會研究全面開放澳門私家車經港珠澳大橋珠海公路口岸進出內地。交通事務局話無參與會議,具體內容唔知道,一言以蔽之,無嘢可以補充。去到呢個時刻,交通事務局還有咩嘢可以做?就連美副將大馬路話設巴士專道,家陣都無下文,之前擴闊路面工程都做埋,但交通事務局解釋開設專道要利用停車位,而目前交局未有計劃取消該區的泊車位,仍想聽大家意見。睇怕都喺等新一屆政府接棒再打算。

山草